Sandreyður

Balaenoptera borealis

Sandreyður

Sandreyður (Balaenoptera borealis)
Lengd	um 19 m
Þyngd	45 t
Blástur	mjór allt að 3 m lóðrétt upp
Öndun	5-20 mín
Köfun	kafar frekar grunnt
Fæða	áta, krabbadýr, svif og smáfiskar
Hámarksaldur	meira en 60 ár
Staða stofns	í útrýmingarhættu

Helstu einkenni

Sandreyður er þriðji stærsti reyðarhvalurinn. Skrokkurinn og byggingin er dæmigerð fyrir reyðarhvali, stór, grannvaxinn og rennilegur. Sandreyður er oftast dökkgrá á baki og ljósgrá á kvið, alsett sporöskjulaga örum eða ljósum hringjum eftir ásætur. Bægslin eru fremur stutt og frammjó og sporðblaðkan hlutfallslega lítil. Sandreyðar eru ásamt langreyðum hraðsyntastar skíðishvala og geta náð allt að 40-45 km hraða á klst.

Hegðun

Sandreyðar eru einfarar og sjást stakar eða í litlum hópum tveggja til þriggja einstaklinga. Stöku sinnum sjást stærri hópar á fæðuríkum stöðum. Sandreyður lætur lítið fyrir sér fara við yfirborðið, hún lyftir hvorki bægslum né sporði og stekkur ekki.

Veiðar og stofnstærð

Um miðbik síðustu aldar voru veiðar á sandreyði verulegar og leiddi það til mikillar fækkunar í stofninum. Sandreyður hefur verið alfriðuð síðan á sjöunda áratug síðustu aldar og áætlað er að stofninn á heimsvísu sé nú um 50.000 dýr.

Sei Range map Meira um sandreyði á Wikipedia, Íslandsvefnum og hvalavefnum.