Um hvalasafnið

Hlutverk 

Hvalasafnið á Húsavík er sjálfseignarstofnun sem ekki er rekin í hagnaðarskyni. Safnið var stofnað árið 1997. Meginmarkmið þess er að miðla fræðslu og upplýsingum um hvali og búsvæði þeirra. Með fræðslu og þekkingaröflun um hvali og lífríki þeirra eykur Hvalasafnið á fræðslugildi hvalaskoðunarferða sem farnar eru frá Húsavík og víðar.

Stutt söguágrip 

Starfsemi Hvalasafnsins sem áður hét Hvalamiðstöðin hófst sem tilraun með lítilli sýningu um hvali. Einungis þremur árum eftir stofnun hafði sýningin náð miklum vinsældum og gestafjöldinn fór fram úr björtustu vonum. Safnið hafði sannað tilverurétt sinn  og nauðsynlegt var að það kæmist í eigin húsnæði sem hentaði starfsemi þess. Gamla sláturhús Kaupfélags Þingeyinga varð fyrir valinu og er nú einn af vinsælustu ferðamannastöðum á Norðurlandi.  Frumkvöðull að stofnun safnsins og forstöðumaður þess í 11 ár er Ásbjörn Björgvinsson, án hans vinnu væri safnið ekki það sem það er í dag. Húsavík og hvalaskoðun á Íslandi eiga Ásbirni mikið að þakka.

Sýningin 

Í 1.600 m² sýningarrými er að finna beinagrindur af mörgum tegundum hvala og heillandi upplýsingar um þessi stærstu dýr jarðar. Yfir 200.000 manns hafa heimsótt Hvalasafnið frá stofnun þess og við hlökkum til að taka á móti enn fleiri.