Það hefur verið mikið að gera hjá okkur hér í Hvalasafninu í sumar þrátt fyrir langan kuldakafla í júní og byrjun júlí. Aðsóknin var t.d. mun meiri í júní en í fyrra og ágúst hefur verið góður.

Hvalaskólinn er orðinn fastur liður í starfsemi safnsins en það leggur mikla áherslu á að fræða börn og lengra komna nemendur um hvali og lífríkið í hafinu. Að venju tóku 5. bekkingar nokkurra grunnskóla á svæðinu þátt í þriggja daga námskeiði í maí þar sem m.a. var farið í bátsferð um flóann og gerðar athuganir á hvölunum og umhverfir þeirra. Einnig var boðið upp á stutt námskeið fyrir börn í tengslum við norrænu strandmenningarhátíðina Sail Húsavík og Mærudaga. Það er alltaf að færast í aukana að grunnskólar, framhaldsskólar og háskólar og sækist eftir að nýta sér Hvalasafnið og lífríki Skjálfandaflóa í kennslunni. Hlutverk Hvalaskólans er að mæta þessari þörf með því að bjóða upp á metnaðarfull námsverkefni fyrir öll skólastig. Námshópar erlendis frá voru sérstaklega áberandi í sumar og má þar nefna fjölmennan hóp úr tveimur alþjóðlegum ungmennabúðum: Arved Fuch og Ice Climate Education. Rannsóknarsetur HÍ á Húsavík er, ásamt hvalaskoðunarfyrirtækjunum á Húsavík, mikilvægur þátttakandi í starfsemi Hvalaskólans og stóð forstöðumaður þess, Marianne Helene Rasmussen, fyrir 10 daga námskeiði fyrir alþjóðlegan hóp nemenda við HÍ (Marine Mammal Field Course).